भैरहवा, ३० भदौं । रुपन्देहीको रोहिणी गाउँपालिका—३स्थित बैकुण्ठपुरमा एक व्यक्तिको गोली हानी हत्या गर्ने ‘सुटर’को तस्बिर क्यामेरामा कैद भएको प्रहरीले अनुसन्धानबाट पत्ता लगाएको छ ।

सुटरको उक्त तस्बिर प्राप्त भइसकेको प्रहरीले जानकारी दिएको छ । आइतबार दिउँसो मोटरसाइकलमा सवार दुई अपरिचित युवाहरुले रुपन्देहीको ओमसतिया गाउँपालिका—५ पट्खौलीका महेन्द्र कुर्मीको हत्या गरेका थिए ।

मृतकको कुर्मीको बायाँ कुममा गोली लागेर उनको घटनास्थलमै मृत्यु भएको थियो । स्थानीयका अनुसार लु ९ प ८२३५ नम्बरको मोटरसाइकलमा श्रीमती र छोरासहित घर फर्किने क्रममा कुर्मीलाई गोली हानिएको थियो ।

‘मृतक कुर्मी भैरहवा स्थित हिमालय बैंकबाट ५ लाख रुपैयाँ निकालेर घरतर्फ जादै गर्दा बिचबाटोमा मोटरसाइकलमा सवार समूहले गोली हानी हत्या गरेर रकम लुटेर फरार भएको छ ।