काठमाडौं, २७ असोज । आज (सोमबार) पहाडी क्षेत्रमा आंशिकदेखि सामान्यसम्म बदली भएको छ भने देशका बाँकी स्थानमा सामान्यतया मौसम सफा रहेको मौसम पूर्वानुमान महाशाखाले जनाएको छ। अपराह्नपछि पहाडी भेगका एक/दुई स्थानमा हल्का वर्षा हुने सम्भावना रहेको मौसमविद् मीनकुमार अर्यालले जानकारी दिए।
आज काठमाडौं उपत्यकामा पनि मौसम सफा रहनेछ। ‘अपराह्नपछि आकाशमा थोरै बादल देखियो भने मात्र,’ मौसमविद् अर्यालले नेपालखबरसँग भने, ‘पानी पर्ने सम्भावनाचाहिँ देखिन्न।’ नेपालबाट मनसुन बाहिरिसकेकाले वर्षाको सम्भावना ह्वात्तै घटेको हो।
‘पूर्वी अर्थात् मनसुनी वायुको प्रभाव अब छैन भने पनि हुन्छ,’ मौसमविद् अर्यालले नेपालखबरसँग भने, ‘अब देशमा पश्चिमी वायुको प्रभाव बढ्दै छ।’ उनका अनुसार अब पश्चिमी वायु र स्थानीय वायुको प्रभावले हिउँदे वर्षा मात्र हुने सम्भावना हुन्छ। ‘तर यो वर्षायामको जस्तो ठूलो र लामो अवधिको हुँदैन,’ उनले भने।
पश्चिमी वायुले मनसुनी वायु विस्थापित गरेपछि मनसुन बाहिरिएको हो। यस वर्षको मनसुन नेपालबाट गत शनिबार बाहिरिएको हो। यस वर्ष पूर्वी नेपालमा जुन २० मा भित्रिएको मनसुन अक्टोबर १२ मा बाहिरिएको हो। मौसम पूर्वानुमान महाशाखाका अनुसार अहिले नेपालमा उल्लेखनीय मौसमी प्रणाली छैन।
दिउँसो देशको पहाडी क्षेत्रमा आंशिक बदली रही अपराह्नपछि १/२ स्थानमा हल्का वर्षाको सम्भावना छ भने बाँकी क्षेत्रमा मौसम सामान्यतया सफा रहनेछ। यस्तै राती देशको पहाडी क्षेत्रमा आंशिक बदली रहनेछ भने मुलुकका बाँकी स्थानमा मौसम सामान्यतया सफा रहनेछ।