सुनसरी, २७ असोज । धरानमा भारतीय रिभल्वर पेस्तोलसहित एकजनालाई प्रहरीले पक्राउ गरेको छ । आइतबार राति इलाका प्रहरी कार्यालय धरानको टोलीले सुनसरीको कोसी गाउँपालिका–३ का २३ वर्षीय निरजकुमार राउतलाई पक्राउ गरी सोमबार सार्वजनिक गरेको हो ।
प्रहरीले उनको साथबाट एकथान रिभल्वर पेस्तोल र ठूलो परिणाममा लागुऔषधसमेत बरामद गरेको छ । विशेष सुराकीको आधारमा राउतको कोठामा छापा मारी भारी मात्रामा लागुऔषध र हतियार बरामद गरेको इलाका प्रहरी कार्यालय धरानका डीएसपी ढुण्डिराज न्यौपानेले जानकारी दिए ।
प्रहरीले राउतको कोठामा छापा मारी एउटा भारतीय म्याग्जिन सहितको पेस्तोल, १३ राउन्ड गोली, विभिन्न किसिमका लागुऔषधहरु र ११ हजार ३०० रुपैयाँ नगद बरामद गरेको हो । पक्राउ परेका राउतविरुद्ध कारबाही प्रक्रिया अगाडि बढाएको प्रहरीले जनाएको छ ।
