जनकपुरधाम । बारा २ मा भइरहेको उपनिर्वाचनमा आचारसंीहता विपरितको कार्य गरेको भन्दै मधेशका मुख्यमन्त्री सरोज कुमार यादवलाई निर्वाचन आयोगले स्पष्टिकरण सोधेको छ ।
आज मतदान भइरहेको बेला निर्वाचन आयोगले मुख्यमन्त्री यादवलाई २४ घण्टै स्पष्टिकरण सोधेको हो । निर्वाचनको स्वच्छता, स्वतन्त्रता र निष्पक्षतामा प्रतिकूल असर पर्नेगरी अनुमतिविना निर्वाचन आचारसंहिता विपरित किन पचरौता नगरपालिकामा गएको भनी आयोगले स्पष्टिकरण सोधेको छ ।
आयोगले मुख्यमन्त्री यादवलाई सोधेको छ, ‘तपाई त्यहाँ जाँदा प्रयोग गरेको सवारी साधन र सुरक्षा व्यवस्था कसरकारी हो, होइन् ? तपाईको यो कार्यले पदको गरिमा र निर्वाचन आचारसंहिता २०७९ को दफा ५ को उल्लंघन हुन्छ, हुँदैन ? निर्वाचन आचारसंहिता उल्लंधन गरेकोमा तपाईलाई निर्वाचन आयोग ऐन २०७३ बमोजिम कारबाही किन नगर्ने ?’
उनी जसपाबाटै मुख्यमन्त्री बनेका छन् । बारा २ को उपनिर्वाचनमा जसपा अध्यक्ष उपेन्द्र यादव स्वंयम उम्मेदवार बनेकाले मुख्यमन्त्री सघाएको आरोप लागेको छ ।
प्रदेशका अर्थमन्त्री सञ्जय यादव समेत निर्वाचन आचारसंहिता विपरित आज मतदान स्थलहरुमा घुमिरहेका छन् । उनलाई पनि जसपाले नै अर्थमन्त्री बनाएकाले अध्यक्ष यादवलाई सहयोग गर्न निर्वाचनमा खटेका छन् ।