जनकपुरधाम, २१ असोज । प्रदेश २ को धनुषा जिल्लामा जेठानीले आफ्नै देवरानीको हत्या गरेर आफैं पनि आत्महत्याको प्रयास गरेकी छिन् ।
धनुषाको औरही गाउँपालिका वडा नम्बर १ झिटकोहियाका अहमद राइनकी श्रीमती २५ बर्षकी सहानी खातुनलाई उनकै जेठानी सनोवल खातुनले सोमवार बेलुका साढे ६ बजे धारिलो हतियार चाकु प्रहार गरेर हत्या गरेकी हुन् । र, हत्या गरे पछि घरका मानिसले किन हत्या गरेको भने पछि आफैं पनि आत्महत्या प्रयास गरेका छन् ।
सनोवलका श्रीमान जिब्राहीन राइन भने बैदेशिक रोजगारीका शिलशिलामा बिदेशमा छन् । जिल्ला प्रहरी कार्यालय धनुषाका प्रवक्ता समेत रहेका प्रहरी नायब उपरीक्षक रामेश्वर कार्कीका अनुसार सनोवलले धारिलो हतियार आफ्नै देवरानी सहानीलाई चार ठाउँमा प्रहार गरेर गम्भीर घाइते बनाएकी थिइन् । पेट, कोख सहित चार ठाउँमा प्रहार गरेर घाईते बनाएकी सहानालाई उपचार गराउन ल्याउँदै गर्दा बाटोमा नै उनको मृत्यु भएको थियो ।
‘त्यसै गरी चक्कु प्रहार गर्ने सनोवलले आफैं पनि पेटमा छुरा घोपेर आत्म हत्याको प्रयास गरेकी थिइन्,’ डिएसपी कार्कीले भने, ‘उनका घर परिवारका सदस्यले मृतक र घाइते दुवैलाई जनकपुरको निजि काव्या अस्पतालमा भर्ना गरेर सबै जना सम्पर्क बिहिन बनेका छन् ।’
घाईते सोनवलको अहिले प्रहरी निगरानीमा सरकारी अस्पताल जनकपुर अञ्चल अस्पतालको सघन कक्षमा उपचार भई रहेको छ भने मृतकको पोष्टमार्टमका लागि शब जनकपुर अञ्चल अस्पतालमा राखिएको छ ।
घटनामा जेठानीको मात्रै हात हो वा अन्य पारिवारिक सदस्य समेतको संलग्नता छ भन्ने बारे अनुसन्धान भइरहेको प्रहरीले जनाएको छ। मृतक सहानीका श्रीमान अहमदलाई अहिले नियन्त्रणमा लिइएको डिएसपी कार्कीले पुष्टी गरेका छन् ।
- अजय अनुरागी/ लोकान्तर
