टुडेखोज/ सप्तरी : भारतीय नागरिकको समूहले कुटपिट गर्दा गम्भिर घाईते भएका सप्तरीका एक किसानको मृत्यु भएको छ ।
डाक्नेश्री नगरपालिका ६ औरहीका ६५ वर्षीय रामदेव यादवको धरानस्थित विपी कोइराला स्वास्थ्य विज्ञान प्रतिष्ठानमा उपचारको क्रममा आईतवार राति मृत्यू भएको हो । उनलाई भारतीय नागरिकले गत भदौ ६ गते नेपाल–भारत सिमा क्षेत्रमा कुटपिट गरेको थियो ।
यादवले लगाएको धानबालीमा भारत विहारको मधुवनी जिल्ला लौकहीका ७/८ जनाको समूहले भैंसी चराए । सोही कारण यादबले भारतीय ति समूहलाई गाली गरे । त्यसपछि भारतीय समूहले यादब र उनका छोरा ललनलाई लाठी र बाँसको भाटाले निर्घात कुटपिट गरेको थियो ।
कुटपिटमा संलग्न रहेकामध्ये एक भारतीयलाई स्थानीयले नियन्त्रणमा लिएर प्रहरीको जिम्मा लगाएका छन् । भारतको लौकहीका १९ वर्षीय प्रदीपकुमार यादवलाई इलाका प्रहरी कार्यालय कल्याणपुरको जिम्मा लगाएको स्थानीयले जनाएको छ ।
जिल्ला प्रहरी कार्यालय सप्तरीका प्रवक्ता तथा डिएसपी तिलक भारती भन्छन्, ‘पक्राउ परेकामाथि कुटपिट शीर्षकमा मुद्दा चलाएका थियौं । तर यादबको मृत्यु भएपछि अब ज्यान मुद्दा शीर्षकमा मुद्दा चलाइनेछ ।’