टुडेखोज/ लहान : सिरहाको मिर्चैया नगरपालिकामाले ब्यापक भ्रष्टाचार गरेको आरोप लगाउँदै स्थानीय राजनीतिक दलहरुले आन्दोलनको घोषणा गरेको छ ।
सर्वदलिय संयुक्त संघर्ष समितिले पत्रकार सम्मेलन गरी आन्दोलनको घोषणा गरेको हो । आन्दोलन अन्तर्गत भदौं २६ मा मिर्चैया बजारमा प्रदर्शन, भदौं २८ मा राघोपुरमा नगरपालिकाको गतिविधिबारे छलफल र असोज २ मा आन्दोलनको समिक्षा गर्दै अगामी आन्दालनको प्रारुप तयार गर्ने जनाएको छ ।
मिर्चैया नगरपालिकाका मेयर श्रवण कुमार यादवले सार्वजनिक गर्नुपर्ने सूचनाहरु लुकाएर चरम भ्रष्टाचार गर्न लागेको समितिले आरोप लगाएको छ । पदिय मर्यादालाई दुरुपयोग गर्दै मेयर यादवले आफु अनूकुल नीति, नियम तथा ऐनलाई अपव्यख्या गरेर भ्रष्टाचार गर्ने गरेको नेकपाका नेता जीवछ साहले बताए ।
उनी भन्छन्, ‘योजना संचालन हुने स्थानका उपभोक्ताको प्रत्यक्ष सहभागीतामा उपभोक्ता समिति गठन गर्ने प्रावधान छ । तर मेयर यादवले त्यसलाई बेवास्ता गर्दै अधिकांश योजनाका उपभोक्ता समितिमा अन्य ठाउँका आफु अनूकुलका व्यक्तिहरुलाई राखेर समिति बनाउँछ । र उक्त समितिले भ्रष्टाचार गर्दा मेयर यादब मोटो रकम कमिशन असुल्ने गर्छन् ।’
![](https://todaykhoj.com/wp-content/uploads/2020/09/mirchaiya-napa-1024x574.png)
नगरपालिकाबाट संचालन भएको योजनाहरुको विस्तृत विवरण सहितको जानकारी लिन लिखित निवेदन दिएर पटक पटक ताकेता गर्दा पनि सुचना उपलब्ध नगराएको नेता अंजय कुमार साहको आरोप छ । सूचना दियो भने मेयर यादबले गरेको भ्रष्टाचारको पोल खुल्ने डरले सूचनाहरु लुकाउने गरेको उनको दावी छ ।