टीकापुर, ९ भदौं । टिकापुरमा आयोजित थरुहटरथारुवान राष्ट्रिय सम्मेलन सम्पन्न भएको छ । सम्मेलनले थरुहट नेता लक्ष्मण थारुलाई कमाण्डर बनाएको हो । सरकारविरुद्ध असहयोगसहितका आन्दोलनका लागि लक्ष्मणको नेतृत्वमा ५१ सदस्यीय मोर्चा गठन गरिएको छ ।
सम्मेलनले सशक्त आन्दोलन सहितको थरुहटरथारुवानको आगामी कार्यदिशा तय गरेको छ । १५ बुँदे टीकापुर घोषणापत्र जारी भएको मोर्चाको प्रवक्ता मीनराज चौधरीले जानकारी दिए । मधेश आन्दोलनपछि छानबिन गर्न गठित गिरिशचन्द्र लालको विभिन्न प्रतिवेदन सार्वजनिक गर्न पनि सरकारसँग माग गरिएको उनले बताए ।
सम्मेलनले पुनः थरुहट आन्दोलनलाई नयाँ सिरामा पुर्याउनुको साथै पहिचान पक्षधरलाई एकताबद्ध गरेको घोषणा पत्रमा उल्लेख छ । हालको ७ प्रदेशको संरचना कुनै पनि हालतमा नमान्ने उद्घोष गर्दै जातीय पृष्ठभूमिको आधारमा पहिचान सहितको १० जोड १ को थरुहटरथारुवान स्वायत्त प्रदेश सीमांकन र नामांकन गरिनुपर्ने माग सारिएको छ
मोर्चाले तराईका जिल्लामा मुठी दान अभियान सञ्चालन गर्ने भएको छ । थरुहट शहीद परिवार, घाइते, राजबन्दी तथा परिवारको भरणपोषण तथा आश्रित बालबालिकाको शिक्षा दीक्षाको लागि थरुहट मुठीदान अभियान चलाउने सो घोषणा पत्रमा उल्लेख छ ।
यस्तै आदिवासी जनजातिको सूचीमा सूचीकृत हुन बाँकी मूलबासी तथा जातिलाई सूचीकृत गर्नुपर्ने, माघी पर्वलाई राष्ट्रिय पर्वको रुपमा मानेर सार्वजनिक बिदा दिनुपर्ने, अष्टिम्की, अट्वारीलगायत पर्वमा प्रदेश सरकारले स्थानीय बिदा दिनुपर्ने माग गरिएको छ ।
२०७२ भदौ ७ मा आन्दोलनकारीबीच भएको झडपमा ८ प्रहरीसहित १ नाबालकको ज्यान गएको थियो भने भदौ ८ गते कर्फ्यू जारी भएकै अवस्थामा थारु समुदायका ८८ वटा घर, पसल, एफएमलगायत संरचनामाथि आगजनि भएपछि आन्दोलनमा शिथिलता आएको थियो ।
उक्त घटनामा संलग्न रहेको भन्दै सरकारले केयौं थारु नेताविरुद्ध मुद्दा चलाए । अहिले कमाण्डर बनेका लक्ष्मण थारु पनि सजाय काटेर जेलबाट निस्केका हुन् । सोही मुद्दामा रेशम चौधरीलाई जन्मकैदको सजाय सुनाएको छ । रेशम अहिले जेलमा छन् ।
