जनकपुरधाम, २२ भदौं । प्रदेश २ का सांसदहरुले विद्यालय छात्रामाथि एसिड प्रहार गर्नेमाथि कड कार्वाहीको माग गरेका छन् । उनीहरुले प्रदेशका छात्राहरुमाथि पटक–पटक एसिड प्रहार भइरहनुले ‘बेटी पढाऊ, बेटी बचाऊ’ अभियान सार्थक बन्न सक्छ ? भनी प्रश्न समेत गरेका छन् ।
झण्डै तीन सातापछि शनिबार बसेको प्रदेशसभाको बैठकमा बोल्दै सांसदहरुले बीरगंज १५ छपकैयामा १५ बर्षीया छात्रा मुस्कान खातुनमाथि दिनदहाडै एसिड प्रहार हुनुले प्रदेशको शान्ति सुरक्षा कमजोर भएको समेत बताए ।
सत्तासिन समाजवादी पार्टीकी सांसद भीमा यादवले निरन्तर प्रदेशका छोरीहरुमाथि एसिड प्रहार भइरहनु चिन्ताको बिषय भएको बताइन् । यो घट्ना बढ्नुले ‘बेटी पढाऊ, बेटी बचाऊ’ अभियान सफल हुनेमा आशंका व्यक्त गरिन् ।
विद्यालय गइरहेकै समयमा छोरीहरुमाथि एसिड प्रहार हुनुले प्रदेशका छोरीहरु असुरक्षित बन्दै गएको बताउँदै उनले प्रदेश सरकारले छोरी लक्षित अभियान ल्याएपनि यो अभियानले काम गर्न नसकेको बताइएन् ।
समाजवादी पार्टीकै अर्काे सांसद करिमा बेगमले एसिड आक्रमण गर्नेमाथि कड कार्वाही गर्नुपर्ने बताइन् । उनले भनिन्, “यस्ता व्यक्तिलाई कठोर कार्वाही गर्न कानून निर्माण गर्नु जरुरी छ ।”
अर्काे सत्तासिन पार्टी राष्ट्रिय जनता पार्टी (राजपा) नेपालका सांसद गणेश कुर्मीले यसरी घट्ना भइरहे जनताले सरकारको अनुभूति गर्न नसक्ने भएकाले आफ्नो अनुभूति देखाउन प्रदेश सरकारले ध्यान दिनुपर्ने बताए ।
नेपाल कम्युनिष्ट पार्टी (नेकपा) का सांसद किशोरी साहले एसिड आक्रमणको घट्नाका दोषीलाई कार्वाही गर्न कड कानूनको आवश्यक्तामा जोड् दिए । उनले भने, ‘प्रदेशमा यस्ता घट्ना दोहोरिरहेकाले नियन्त्रण गर्न कड किसिमको कानून निर्माण गर्नु जरुरी छ ।’
नेपाली काँग्रेसका सांसद राजेश्वर प्रसाद साहले छोरीहरुमाथि लगातार एसिड प्रहार हुनुले प्रदेशको शान्ति सुरक्षा कमजोर रहेको छर्लङ्ग पारेको बताए । उनले शान्ति सुरक्षा राम्रो बनाउनेतर्फ ध्यान दिन प्रदेश सरकारको ध्यानाधकर्षण गराए ।
