जनकपुरधाम, २६ भदौं । नेपाल कम्युनिष्ट पार्टी (नेकपा) प्रदेश २ मा चुलिएको विवाद प्रदेशको राजधानीसम्म पुगेको छ । प्रदेश सभामा छलफलमा रहेको प्रदेश २ को नाम र राजधानी सम्बन्धी प्रस्तावको संशोधनका लागि तोकिएको म्याद बुधवार समाप्त भएको छ ।

नेकपाका साँसदहरुले नाम र राजधानी दुवैमा संशोधन प्रस्ताव दर्ता गरेका छन् । सो पार्टीका साँसद सीता गुरुंग र शारदा थापाले प्रदेशको नाममा संशोधन प्रस्ताव दर्ता गरेका छन् । उनीहरुले दर्ता गरेको प्रस्तावमा प्रदेशको नाम जानकी हुनुपर्ने उल्लेख छ । राजधानीका लागि नेकपाका २ जना साँसदले संशोधन प्रस्ताव दर्ता गराएका छन् ।

नेकपाका साँसद रामचन्द्र मण्डल र किसोरी साहले प्रदेशको राजधानीको सीमा विषयमा छुट्टाछुट्टै प्रस्ताव दर्ता गरेका छन् । मण्डलले दर्ता गराएको प्रस्तावमा जनकपुरधामलाई राजधानी कायम गर्नुपर्ने छ । त्यसैगरि साहले दर्ता गरेको प्रस्तावमा जनकपुरधाम र सम्पूर्ण धनुषा जिल्ला, परिक्रमा मार्ग समेतलाई समेटिएको छ ।साहले दर्ता गरेकै आशयको प्रस्ताव सो पार्टीले पनि भदौ ५ गते दर्ता गराएको छ ।

शुक्रवार बस्ने प्रदेश सभा बैठकमा प्रस्तावहरु उपर पूनःछलफल हुनेछ । प्रदेशको नाम र राजधानीलाई सर्वसम्मतीबाट टुंग्याउन सभामुखको संयोजकत्वमा संसदीय समिति गठन हुने बताइएको छ । समाजवादी पार्टीबाट २, राजपाबाट २, नेकपाबाट २ र नेपाली काँग्रेसबाट २ र संघिय समाजवादी पार्टीका १ जना साँसदलाई राखिनेछ ।

एक महिनाको समयावधी राखेर बनाइने सो समितिले सर्वसम्मतीबाट नाम र राजधानी टुंग्याउने प्रयत्न गर्ने बताइएको छ । राजधानीका लागि खासै विवाद नरहेपनि नाममा समेत सहमति हुने व्यापक संभावना रहेको साँसदहरुले जनाएका छन् । प्रदेश सचिवालयका अनुसार राजधानीमा मण्डल र साहको संशोधन परेपनि नाममा कुनै संशोधन परेको छैन् ।

राजधानीका लागि दुई तिहाई भन्दा बढी नै मत पुग्ने भएपनि नाममा झमेला देखिन्छ । राजधानीका विषयमा ५ वटा र नामको विषयमा दलगत अधारमा प्रस्ताव दर्ता गरिएको छ । सत्तारुढ समाजवादी पार्टीका ३०, राजपाका २५ , संघिय समाजवादी पार्टीका १ र स्वतन्त्र १ समेत गरी सरकारसित ५७ मत छ । नेकपाको ३२, नेपाली कांग्रेसको १९ मत छ । दुई तिहाईका लागि ७२ मत आवश्यक छ ।

राजधानीका लागि समाजवादी, राजपा र नेकपाको प्रस्ताव मिल्दोजुल्दो रहेकाले दुई तिहाई भन्दा बढी मत पर्ने संभावना छ । तर नाममा सहमति जुटाउन झमेला छ । प्रदेशको राजधानी र नामको मतदानमा पार्टीको व्हिप नलाग्ने भएका कारण ‘फ्लोर क्रस’ हुने संभावना व्यापक छ । नेकपा र नेपाली काँग्रेसको मत नाम र राजधानीमा बाँडिए जस्तै सत्तारुढ दलहरुको मतपनि राजधानीमा बाँडिन सक्छ ।