काठमाडौं, २६ असोज । १३ जना मान्छेलाई ज्यूँदै इँटाभट्टीमा पोलेर हत्या गरेको आरोपमा नेपाली कांग्रेसका सांसद तथा पूर्वमन्त्री मोहमद अफताव आलम पक्राउ परेका छन् ।
घटनाको १२ वर्षपछि यति ‘क्रुर’ घटनाको आरोपमा सांसद पक्राउ परेपछि आम नेपालीलाई आश्चर्यमा समेत पारेको छ । काठमाडौं र रौतहटको प्रहरीले उनलाई रौतहटस्थित आफ्नै निवासबाट पक्राउ गरेको हो ।
यस्तो रहेछ आलमको अपराध कहानी
२०६४ साल चैत्र २७ गते बुधबार साँझ साढे ६ बजे रौतहटको साविकको राजपुरफरहदवा गाविस ४ स्थित शेख इद्रिसको घरमा बम बिस्फोट भएको थियो । बिष्फोटमा इद्रिसको घरको छानो समेत नष्ट भएको थियो । इद्रिस अहिले पक्राउ परेका आलमका काका हुन् ।
उक्त बिष्फोटमा नारायणसिंह राजपुतका २२ वर्षीय छोरा पिन्टु भन्ने त्रिलोकप्रताप सिंह र रोक्साना खातुनको छोरा वर्ष २२ वर्षीय ओसी अख्तरसहित अन्य केही व्यक्ति घाइते भएका थिए ।
भोलिपल्ट चैत २८ गते संविधानसभा सदस्य चुनावको प्रचार प्रसारका लागि आलमले पिन्टु र ओसीलाई आफ्ना मान्छेमार्फत घरबाट लिएर गएका थिए । निर्वाचनमा आफू विजय हुन र अन्य पार्टीका कार्यकर्ताहरूलाई तर्साउन भन्दै आलमको योजनामा काकाको घरमा बम बनाइयो । बम बनाउने क्रममा विष्फोट हुँदा पिन्टु र ओसीसहित अन्य व्यक्ति पनि घाइते भए ।
घाइते पिन्टु र ओसीले होशमा छँदै हामीलाई उपचार गराउनुहोस् वा हामीलाई छाडी दिनुहोस् भनेका थिए । तर, उनीहरुलाई छाड्दा उक्त बम बिष्फोटको घटना सार्वजनिक हुने भन्दै आलमको योजनामै उनीहरुले छाडिएन । उपचार गर्न पनि लगिएन ।
त्यसपछि आलमकै योजनामा पिन्टु र ओसीलाई नजिकैको इँटा भट्टामा लगेर जिउँदै पोलेर हत्या गरिएको थियो । उनीहरुलाई ज्यूँदै पोलेको देख्ने स्थानीय चश्मदीदले समेत बयान दिएका थिए । आलमकै योजनामा हत्या भएको जानकारी पाएपछि पिन्टु र ओसीका अभिभावकले जिल्ला प्रहरी कार्यालय रौतहटमा आलमसहित उनका भाई मोहम्मद मोहताब आलम, शेख भदई, शेख मोविन आलम, शेष सराजविरुद्ध कर्तव्य ज्यानमा किटानी जाहेरी दिएका थिए ।
त्यसबेला रौतटह प्रहरीले किटानी जाहेरी लिएन । उक्त जाहेरी बार एशोसिएसनको रोहबरमा सनाखत भएको भए पनि उक्त घटनाको विषयमा विपक्षीहरूलाई गम्भीर भई अनुसन्धान अगाडि बढाउन र अपराधीलाई कारवाही गर्न बारम्बार अनुरोध गर्दा समेत कुनै सुनुवाई नगरिएको पीडितको आरोप थियो ।
यो घटनाका बारेमा त्यसबेला इन्सेक, नेपाल वार एशोसिएसन तथा मानवअधिकार आयोगले स्थलगत अध्ययन गरी न्यायिक छानबीन आयोगको माग गरेका थिए ।
पछि उक्त मुद्दामा २०६५ असार ३० गते महान्यायाधिवक्ता कार्यालयबाट मारिएका भनिएका व्यक्तिहरूको मृत्यु भएको भन्ने यकिन हुन नसकेको साथै उनीहरुको मृत्यु हत्याबाट हुन गएको भन्ने पुष्टि हुन सकेको भन्दै हत्या देखिएमा पछि मुद्दा चलाउन सकिने हुँदा अहिले कसैउपर मुद्दा नचलाउने निर्णय भएको थियो ।
इँटाभट्टा तथा शेख इद्रिसको गोठ घरको माटो परीक्षणको लागि त्यसबेला केन्द्रीय प्रहरी विधिविज्ञान प्रयोगशाला, महाराजगञ्ज, काठमाडौंमा पठाइयो । बालुवा जस्तो पदार्थमा मानिस जलाएको देखिन्छ–देखिँदैन भन्ने बारेमा विष्फोटक पदार्थ परीक्षण गर्ने सुविधा हाल यस प्रयोगशालामा नभएको भन्ने उत्तर प्रहरीको विधि विज्ञानले पठाएको थियो ।
त्यसबेला आरोपितमध्येका शेख इद्रिसलाई पक्राउ गरिए पनि सबुद प्रमाण नपुगेको भन्दै जिम्मा जमानीमा छाडिएको थियो । उक्त मुद्दामा कपोलकल्पित व्यहोरा उल्लेख गरी अदालत समक्ष दर्ता गराएको रिट निवेदन खारेजभागी छ, खारेज गरिपाऊँ भनी जिल्ला प्रहरी कार्यालय, रौतहट गौरका तत्कालीन प्रमुख एसपी जयबहादुर चन्दको लिखित जवाफ दिएका थिए ।
बम विष्फोटन भएको घटनास्थल मुचुल्का, बम विष्फोटनबाट पिन्टु र ओसी अख्तरलाई चोट लागेको देख्ने सराजुल मियाँ र ओहीद मियाँको कागजबाट घटना घटेको पुष्टि भएको थियो ।
घटनास्थलबाट बरामद भएको माटो तथा मृतक ओसी अख्तर मियाँको स्वीटर हाइनेक, कालो रङ्गको मोजा जोडी, कालो रङ्गको जुत्ता जोडी फेला परेको थियो । ती सबदुहरु रौतहट प्रहरीले २०६५ जेठ १९ गते जाँचका लागि पठाएको पत्रबाट पुष्टि भएको थियो ।
प्रहरीकै पत्रमै यस्ता प्रमाण उल्लेख भएको अवस्थामा या त लाश वा जीवित व्यक्तिको उपस्थिति प्रतिवादीले देखाउन सक्नु पर्नेमा आलमले देखाउन नसकेको भन्दै पीडित पक्षका अधिवक्ताद्धय केदारप्रसाद दाहाल र नारायणप्रसाद देवकोटाले सर्वोच्च अदालतमा बहस नोट पेश गरेका थिए ।
हत्या अरोपितहरुले मृतकका बारेमा केही बताउन नसकेकाले यर्थाथ छानबिन गर्नुपर्ने देखिएको सर्वोच्चको ठहर थियो । जसकारण घाइते अवस्थाका पिन्टु र ओसीलाई जिउँदै जलाई मारेको घटनाको सम्बन्धमा मुद्दा चलाउनु पर्ने अवस्था देखिएकाले मुद्दा नचलाउने भनी गरिएको रौतहट जिल्ला सरकारी वकील कार्यालयको निर्णयलाई सदर गरेको पुनरावेदन सरकारी वकील कार्यालय, हेटौंडाको निर्णयलाई सदर गर्ने गरी महान्यायाधिवक्ता कार्यालयको मिति २०६५ असार ३० गतेको निणर्य सर्वोच्च अदालतका न्यायाधीश सुशीला कार्कीले २०६९ जेठ १६ गते उत्प्रेषणको आदेशद्वारा बदर गरिदिएको थियो ।
उक्त मुद्दाको गम्भीर रूपले अनुसन्धान गरी कारबाही गर्न समेत अदालतले आदेश दिएको थियो । सुशीला कार्की पछि प्रधानन्यायाधीश भइन् । उनीविरुद्ध कांग्रेसले महाभियोग प्रस्ताव नै ल्यायो ।
अदालतको आदेश पछि पनि आलमलाई प्रहरीले पक्राउ गरेन ।
बरु आफ्नो छोराको हत्यारालाई कार्वाही गर्दै सर्वोच्चमा रिट दिएकी ओसीका आमा रोक्सना खातुनको रौतहटमा नै रहस्यमय ढंगले हत्या भयो । छोराको हत्यारामाथि कार्वाहीको माग गर्दागर्दै खातुनको हत्या भएको थियो । खातुनका हत्यारा पनि पक्राउ परेका छैनन् । यसमा पनि शंकाको सुइ आलमतिरै सोझिएको छ ।
२०१९ असार ५ गते जन्मिएका अफताब आलम स्नातक ९बिएस्सी० सम्मको अध्ययन गरेका छन् । २०५३ सालको उपनिर्वाचन, २०५६ र २०६४ सालमा रौतहट २ बाट बिजयी भएका आलम बिभिन्न पटक–पटक गरी ६ पटक बिभिन्न मन्त्रालयहरु सम्हालेका छन् ।
२०३४ सालबाट राजनितिक यात्रा शुरु गरेका आलम २०४५ सालदेखि पार्टीको कार्यबाहक सभापति हुँदै दुइ पटक जिल्ला सभापति र एक पटक केन्द्रिय सदस्य भइसकेका छन् । २०७० सालको संबिधान सभाको निर्वाचनमा भने उनी पराजित भएका थिए । ०७४ सालमा सम्पन्न निर्वाचनमा उनी रौतहट २ बाट विजयी भएका थिए । – नयाँपेज
