जनकपुरधाम, २७ असोज । राष्ट्रिय जनता पार्टी (राजपा)का एक सांसदले नै जनकपुर विमानस्थलमा तोडफोड र कर्मचारीमाथि हातपात गरेका छन् ।
राजपा सांसद प्रमोदकुमार साहले आज जनकपुर विमानस्थलको कार्यालयमा तोडफोड गरेका हुन् । संघीय सांसद साहले विमान ढिलो (डिले) भएको भन्दै विमानस्थलस्थित बुद्ध एयरको काउण्टर तोडफोड गर्नुका साथै कर्मचारीमाथि समेत हातपात गरेका हुन् ।
सर्लाहीको निर्वाचन क्षेत्र नं। १ बाट प्रतिनिधिसभामा निर्वाचित सांसद साह विमान ढिलो भएको भन्दै तोडफोडमै उत्रिएका विमानस्थल कार्यालयले जनाएको छ । ११ः०० मा उडान हुनुपर्ने बुद्ध एयरको जहाज दिउँसो डेढ बजेसम्म नआएको र व्यवस्थापन पक्षले लापरवाही गरेको भन्दै आक्रोशित सांसदले तोडफोडका साथ कर्मचारीमाथि ठेलठाल गरेका थिए ।
सांसद साहले काउण्टरमा धक्काधक्की गरेको स्वीकार गरेका छन् । ‘जहाजमा किडनीका विरामीलाई समयमै काठमाडौं पुग्नुपर्ने छ, तर जहाज आउने, नआउने कुनै सूचना छैन १ व्यवस्थापन पक्षलाई भन्दा कुनै वास्ता गर्दैन, बाध्य भएर काउण्टरमा बुझ्न जाँदा अटेरी गर्दा रिसको झोंकले काउण्टरमा सामान्य तोडफोड भयो’, उनले भने ।
जनकपुरधाम उप–महानगरपालिका ४ का ६५ वर्षीय मृगौला रोगी सौखीलाल चौधरीलाई काठमाडौं पठाउन विमानस्थल व्यवस्थापन पक्षलाई पटक–पटक फोन गर्दा समेत अटेरी गरेको उनको आरोप छ । ‘मृगौलाका विरामी पीडाले छटपटाइरहेको अवस्थालाई देखेर म आक्रोशमा आएँ र धक्कामुक्की भयो’ उनले भने ।
बुद्ध एयरका प्रमुख विजयकुमार सिंहले भने प्राविधिक कारणले विमान उडानमा ढिलाइ भएको बताएका छन् । उनले भने, ‘यात्रुहरुलाई प्ले डिले भएको पटक–पटक जानकारी गराउँदै आएको हो, तर सांसद साह एक्कासी आएर बुद्ध एयरको काउण्टरमा तोडफोडसँगै कर्मचारीमाथि हात उठाउनु भयो ।’
सांसद साहले तोडफोड गरेपछि विमानस्थलको अवस्था केही बेर तनावग्रस्त बनेको थियो । बुद्ध एयरको सोही फ्लाइटमा काठमाडौं जान लागेका सांसद साहलाई बुद्ध एयरका कर्मचारी र व्यवस्थापक प्रमुख सिंहले विमान चढ्नबाट रोकेका थिए ।
त्यस क्रममा सांसद साह र प्रमुख सिंह बीच हात हालाहाल समेत भएको जनाइएको छ । पछि धनुषा प्रमुख जिल्ला अधिकारी प्रदीपराज कणेलको पहलमा सांसद साह विमान चढेर काठमाडौं गएका जनाइएको छ ।
